ترنيمة كل عيد وأنتي بخير يا أمي

كل عيد وأنت بخير يا أمي
يا أوّل الكلمات عَ تمي
مهما يغنّوا ويكتبوا الشعّار
أجمل قصيدة بالدني أمي
أمي.. أمي.. أمي..

ياما حملت هموم وسهرتِ
تَ الصبح وعّى الشمس ما نمتِ
عَ قدّ ما عطيتي دفا بردتِ
ودبتِ شمع تتنوري ظلمي
أمي.. أمي.. أمي..

2

لولا وجودك ما كنت موجود
يللي حنانك بحر مالو حدود
يا خجلتي بالعيد جبت ورود
وأنتِ الهوا الممزوج بدمي
أمي.. أمي.. أمي..

عمري يا ربي خود واعطيها
مديون ببقى ما بوفّيها
أمي ما ظنّ يوم كافيها
من صغر سنّي حاملة همّي
أمي.. أمي.. أمي..