ليه الولد مابيمسكش ايد البنت وهم ماشين فى الشارع

ليه الولد مابيمسكش ايد البنت وهم ماشين فى الشارع

من قديم الأزل والصراعات بين آدم وحواء موجودة، ورغم المحاولات المستميتة للتوفيق بينهما ولكن لا حياة لمن تنادى، وكان آخر هذه المحاولات الدورة التدريبية التى عقدها مركز القاهرة للتنمية بعنوان "علاقة الرجال والنساء صراع أم تكامل". ليه الولد مابيمسكش ايد البنت
ليه الولد مابيمسكش ايد البنت
كتبت: مى عبدالله

الدورة كانت خفيفة لطيفة حضرت نصف ساعة منها ولم أستطع أن أكمل بصراحة، مع أن القاعة كانت مليئة بفطاحل العلاقات الاجتماعية والزوجية لكن شعرت أنه كلام نظرى بعيد كل البعد عن واقعنا العملى يعنى مثلا ممكن حد يقول لى ليه الموقف ده بيحصل.

قبل الخطوبة البنت تسأل الولد انت ليه مش بتمسك إيدى وإحنا ماشيين فى الشارع؟ فالرد المنطقى يكون جاهز ومتحضر: مينفعش إفرضى حد من قرايبك شافنا ولا أخوكى لمحنا، بكرة يا قمر نتخطب وأمسك ايدك قدام العالم كله، نفس الموقف يتكرر بعد الخطوبة والبنت المسكينة تسأله نفس السؤال والرد المنطقى برضه بيكون جاهز،مينفعش إنتى عايزة الناس تفتكر اننا عشان اتخطبنا هنمشى بقى على حل شعرنا وبعدين بصراحة كده أنا مستحرم بكرة نتجوز يا قمر وأمسك إيدك وإنتى مراتى حبيبتى حلالى، بعد الزواج نفس الموقف ونفس السؤال ونفس البنت المسكينة ونفس الرد المنطقى بيكون جاهز، يا حبيبتى بطلى شغل المراهقين ده إحنا متجوزين مش ماشيين مع بعض بكرة أجيبك من عند أمك ونروح بيتنا يا قمر وأمسك إيدك براحتى.

ليه الولد مابيمسكش ايد البنت

بعد الزواج ومرحلة الأطفال نفس الموقف ونفس السؤال ونفس الرد البارد برضه بيكون جاهز يعنى إنتى عامية أمسك إيدك ولا أمسك إيد الواد ولا أشيل الحاجات دى كلها إيه الست دى.
بعد 25 سنة زواج نفس الموقف ونفس الست المسكينة بسؤالها الممل والرد بيكون طبعا جاهز إيدك إيه بس إللى هامسكها دلوقتى إنتى عايزة جوز بنتك يقول علينا بنعيش مراهقة متاخرة، بعد نصف قرن من الزواج وقبل ما نصف السؤال يتسأل الرد أكيد جاهز، يعنى أمسك إيدك وأسيب العكاز وأقع أتكفى على وشى أنا عارف نيتك السوده عايزة تخلصى منى وتورثينى.

هى دى العلاقة بين الرجل والمرأة إللى عمرها ما هتتغير ولو عملنا مليون ألف دورة من نوعية دورات مركز القاهرة للتنمية بس يمكن لو كل رجل قرأ الموقف السابق بتانى وشاف هو بيكرره كام مرة فى اليوم ولا فى الأسبوع ولا فى الشهر أكيد مش هتتغير برضه العلاقة بين الرجل والمرأة ...