مسرحية (غدر الصديق)

مسرحية (غدر الصديق)

المنظر:ديكور بسيط يوحي بأننا في أحد السجون التابعة للشرطة
(يدخل العسكري دافعاً أحد المتهمين "مرسي" داخل العنبر)
العسكري : يلا يا متهم..جتكوا البلاوي
مفيد: تاني يا عم؟!..مش المخرج قالك زقة جامدة شوية؟!
العسكري : هص..انت بتقول ايه؟!..العرض بدأ والناس قاعدة تتفرج!
مفيد : ما انا عارف يابا..والناس دي أكيد مش مقتنعة بالزقة اللي
سعادتك يا محترم زقتهالي
العسكري : ليه بقي ان شاء الله؟!
مفيد: هو انت ياعم بتزق واحد داخل كافتريا ولا فندق؟!..دا سجن يابا..اصلاح وتهذيب..وأحياناً تأديب..وأحياناً لسع عالقفا..ياسلام كده علي ايد مخبر ربنا طارح فيهاالبركه وهي بتطرقعلك كده..ياااااااه
العسكري : ماشي يا مفيد اللمض..نعيده تاني م الأول..يلا تعالي
( يخرجان ويقومان باعادة الحركة مع دفعة قوية جداً يندفع علي أثرها مفيد أرضاً)
مفيد : اه كدة ..هو دا السجن اللي أنا أعرفه..ما علينا..شكراً يا عم علي كده..خلينا نبدأ بقي..(ينظر حوله)..بس ايه ده؟!..هو السجن ماله فاضي كده؟!..هو أنا لوحدي المجرم ف البلد دي ولا ايه؟!..لأ..كده مينفعش..أقولوكو..استنوا حبه..نغير المنظر ونرجع كمان شوية..يمكن يكون اتملي بناس ملايكة زيي كده..(يخرج)

(إظــــــــــــــلام)








المنظر : ديكور بسيط لأحد منازل مصر القديمة ذات الطابع الشعبي الفقير
(تدخل الأم"نوال" وهي تحمل صينية عليها كوبان من الشاي لها ولزوجها "لطفى )
نوال : (وهي تقلب الشاي)..الشاي يا ابو صبرى !!
لطفى : ها؟!..معلش يا نوال..كنتي بتقولي حاجة؟!
نوال : الله ياابو صبرى..اللي واخد عقلك يا مقدس
لطفى : والله زمان يا مقدسه..فاكرة..(يتذكر).."اللي واخد عقلك غيري يا ابواصبرى؟!"..ياااه..زمن..فاكرة الكورنيش؟!
نوال : شوف الراجل؟!..طب ما أنا جنبك أهو..ها..فيه ايه ف الجرنان النهاردة..سمعني الاخبار
لطفى : زي كل يوم يا نوال .زي ما بيقولوا.."لا جديد تحت الشمس"..الهم مالي الأخبار..والناس عايشه وشايلة.. دا انا عيني مققت م القرايه..عمال أدور للواد صبرى علي أي شغلانة فاضية..اه يا مقدسه..إلا صحيح مش سامعله حس النهارده يعني؟!
نوال : ياحبة عين أمه نزل من صباحية ربنا..بيقول هايعدي علي حاتم صاحبه ويروح معاه يشوفوا شغلانة جديدة الواد حاتم بيقول إنها لقطة
لطفى : أهو مش جايب ابنك ورا الا الزفت اللي اسمه حاتم ده
نوال : ايوه صحيح يا مقدس..بس هاتعمل ايه بقي..صبرى روحه فيه..وانت عارف الواد مالوش اخوات وهو اللي حيلتنا ف الدنيا..وصبرى قلبه أبيض يا مقدس..
لطفى : ماهو دا اللي مجنني يا نوال..والله لو كان باديا كنت ضربتله الأرض طلعت دهب..لكن زي ما انت شايفه..بعد المعاش الواحد قاعد لا شغله ولا مشغله..العين بصيره والايد قصيره..حتي القرشين بتوع أول كل شهر..ماينفعوش
(في هذه اللحظة يدخل صبرى)
نوال : أهو صبرى رجع أهو يا مقدس
صبرى: (في نكد واضح) ازيك ياما..ازيك يابا؟
لطفى : مالك يابني..شايل طاجن ستك كده ليه؟!..امك قالتلي انك كنت مع اللي ما يتسمي حاتم بتشوفوا شغلانه كده جايبهالك
صبرى : (مقاطعاً).. أنا معرفش يابا انت ليه قارش ملحته كده..حاتم بيحبني وبيخاف عليا..وبعدين انا مكنتش معاه النهارده
نوال : مش انت قايلي انك نازل معاه يا بني؟!
صبرى : أيوه ياما..عديت عليه الصبح لقيته بعافية شوية..وقالي روح انت لوحدك
لطفى : والشغلانة دي فين يابني؟!
صبرى : زي ما تكون يا مقدس..هو الواحد لاقي؟!
لطفى ايوه يابني بس انت مينفعش تبهدل نفسك ف أي شغلانة كده ولا كده يعني
صبرى : يعني أنا كنت لاقي وقلت لأ يا ابا .ماهو علي يدك..من ساعة ماتخرجت وكعب داير علي كل حته فيكي يا مصر..تصدق ؟!..أنا بقيت مكسوف م الشهادة اللي معلقها جوه دي.. ولا شغله ينفع أشتغلها بيها..وكأن الخلق كلها عايزة تنسيني اللي اتعلمته ف الجامعة!
لطفى : قلقتني يابني..هاتشتغل ايه ماتتكلم..
صبرى : عارف يابا محل الأكل اللي ف آخر الشارع..الواد اللي كان شغال ع الفيزبا سافر بره..
نوال : يا لهوي يابني..تسرح بفيزبا ع البيوت؟!
صبرىر : الشغل مش عيب ياما..
لطفى : ايوه يابني بس...
صبرى : يابا لو عند حل قولهولي..ماتآخذنيش يابا ما انت بتتكلم من زمان..ومن ساعة المعاش وانت قاعد هنا..عملتلي ايه يعني؟!
لطفى : (في تأثر أبوي)..كده يا صبرى؟!..الله يسامحك..يعني دا ذنبي يابني؟!
صبرى : (يتراجع)..أنا آسف يابا..ينقطع لساني ولا كنت قلتها..ابوس ايدك سامحني يابا..(يفعل)
لطفى : (يحتضنه)مسامحك يابني..وحياتك حاسس بيك..بس غصب عني
نوال : (في عتاب واضح)..متقولش كده يا ابو صابر..يعني هو ده جزاتك انك ربيت وعلمت وكبرت؟!
صبرى : ما كفايه بقي ياما..أنا اللي فيا مكفيني..(يوجه الحديث للأب)..عشان خاطري يابا..سيبني أجرب..وربنا يسهل
لطفى : براحتك يابني..بس أنا كان بودي أشوفك أحسن واحد ف الدنيا.. ربنا يكرمك يا بني

(إظــــــــــــلام)





المنظر : جانب المسرح الأول ديكور منزل صبرى و الجانب الثاني مكتب يجلس عليه موظف

يضاء النصف الثاني ويدخل صبرى علي الموظف) صبرى)

الموظف : .اتفضل..ايتها خدمة؟
صبرى : أنا كنت جاي بخصوص موضوع الشغلانة الفاضية
الموظف : لامؤاخذه يا محترم..شغلانة ايه بالظبط؟!
صبرى : الشغلانة بتاعة الفيزبا!
الموظف : اااه..بس خسارة..اتخدت يا بيه..فرصة تانية بقي
صبرى : ازاي؟!..دا انا كنت هنا امبارح وقالولي بره انها لسه موجودة.. وحاتم مكلمني النهارده وقاللي انه مخلصها مع الناس هنا ف المحل!
الموظف : (بانتباه شديد) حاتم؟!..حاتم مين يا......الا انت اسمك ايه؟!
صبرى : صبرى..
الموظف : صابر حاف كده من غير ألقاب؟!
صبرى: صابر لطفى
الموظف : واللي اسمه حاتم ده اسمه حاتم ايه؟!
صبرى : حاتم عبد الشهيد
الموظف : أهلاً أهلاً بريحة الحبايب..مش تقولي كده م الأول..حاتم كلمني عنك كتير..إزيك يا عم صبرى؟!
صبرى أنا كويس بس...
الموظف : تشرب ايه الأول؟!
صبرى : شكراً..بس هو سيادتك تعرف حاتم؟!
الموظف : حاتم دا اخويا وصاحبي..أمال؟!..(يضحك)..دا احنا ياما كلنا مع بعض عيش وملح
صبرى : دا شئ عظيم..حاتم برضه زي اخويا
الموظف : طبعاً طبعاً..هو واد جدع ويستاهل(بحده ثم يتدارك نفسه)..كل خير..اه..كل خير..المهم..حاتم قالي انك واد مفتح وتحب القرش..وبيقول كمان انه ضامنك زي عنيه
صبرى : مش أما نشوف القرش دا الاول؟!
الموظف : (يصطنع الضحك)..لأ دمك خفيف يا صبرى..أن كان ع القرش هاتشوفه وهايبقي بدل القرش عشره..لأ..ميه..بس تشغل مخك معايا وانت تاكل #### وملبن..قوللي..حاتم كلمك ع الشغلانة؟
صبرى : طبعاً..(وقد بدأ الشك يتسرب داخله)..بس هي الشغلة ايه بالظبط؟!
الموظف : (ببلاهة)..توصيييل..مجرد توصييييل..هتاخد القرش وتوصل القرش
صبرى : (باشمئزاز)قرش ايه وبتاع ايه؟!..أنا مش فاهم حاجة!
الموظف : (وقد أخرج من درج المكتب كيس مخدرات) وآآآآدي القرش!
صبرى : (منزعجاً)..ايه ده؟!
الموظف : كيف..مزاج..هايكون ملح يعني؟!
صبرى : (وقد أمسك به من عنقه وهو يهزه منفعلاً)آآه يا .......هي وصلت بيك لكده..لكن العيب مش عليك..حاتم..يانهار اسود..حاتم ..بعد كل ده يطلع كده؟!.
الموظف : (وقد بدأ صوته يختنق) الحقوني..ال..حق..و..ن..ي
(تكون مجموعة قد دخلت والموظف يسقط أرضاً ميتاً)
ممثل1 : .. الراجل مات!
صبرى : ايه؟!..مات؟!

ممثل2 : امسكوه..يا مجرم يا قاتل
(تنقض مجموعة علي صبرى ويلقون القبض عليه)
ممثل3 : حد يكلم النجده يا جماعة..الراجل مات يا اخوانا!
(إظلام علي هذا الجانب ثم يضاء الجانب الأول "منزل صابر")
نوال : ياخراب بيتك يا لطفى..ياخراب بيتك يا لطفى
لطفى : ايه يا فيه ايه
نوال : الواد صبرىر قبضوا عليه!
لطفى : ايه؟! انت بتخرفي بتقولي ايه؟!..لا يمكن أبداً
نوال : لسه مكلمني م القسم
لطفى : قسم؟!..الواد عمل ايه عمل ايه يا وليه
محاسن : الواد هايروح مننا اهى هىهى
لطفى : بقولك عمل ايه؟!
نوال : (بهستيرية)..الواد هايروح مننا يا لطفى
لطفى : (بصوت أعلي)..بقولك عمل ايه؟!
نوال : بيقولوا موت الراجل بتاع محل الأكل..
لطفى: ايه؟!..مش ممكن..مش ممكن
نوال : قال ايه عرض عليه شغلة بطالة
لطفى : عملها حاتم ..طب هدي روحك ..انا رايح اشوف فيه ايه..
(إظلام علي هذا الجانب ويتحرك الأب بعرض المسرح إلي الجانب الآخر ويكون المكتب قد تحول إلي منصة محكمة وصبرى يقف كمتهم وعندما يصل الأب يضاء حول المنظر)
القاضي : حكمت المحكمة حضورياً علي المتهم بالسجن خمس سنوات.. رفعت الجلسة
صبرى : لا..لا..لا
لطفى : صبرى..لأيابني..دا حرام يا ناس..لأ يابني

كورس
:
بتنادي ومين يسمع
غدر الصديق يوجع

يارب يا سامع....طيب جروح القلب
صابر بقلب الناس....يزرع زهور الحب

راسم علي عيونه....سكة محبة ونور
صاحبه اللي بيخونه....طير والجناح مكسور

بتنادي ومين يسمع
غدر الصديق يوجع

(إظـــــــــــــــــــلام)